દેશની સૌથી મોટી જાહેર ક્ષેત્રની બેંકોમાંની એક બેંક ઓફ બરોડાના ગ્રાહકો માટે ખરાબ સમાચાર છે. પોતાના ગ્રાહકોને આંચકો આપતા બેંકે ફરી એકવાર લોન લેવી મોંઘી કરી દીધી છે. બેંક ઓફ બરોડાએ માર્જિનલ કોસ્ટ ફંડ આધારિત લેન્ડિંગ રેટ (MCLR)માં 10-15 બેસિસ પોઈન્ટનો વધારો કર્યો છે. નવા દરો આજથી એટલે કે 12 જુલાઈથી લાગુ થઈ ગયા છે. હવે બેંકોમાંથી અનેક પ્રકારની લોન પહેલા કરતા મોંઘી થઈ ગઈ છે. આ સાથે, માસિક EMI વધવાથી લોન લેનારાઓના ખિસ્સા પર અસર પડી છે. બેંક દ્વારા શેરબજારને મોકલવામાં આવેલી માહિતીમાં જણાવ્યા મુજબ 12 જુલાઈ, 2022થી MCLR વધારવાની મંજૂરી આપવામાં આવી છે.

બેંક ઓફ બરોડાએ ટૂંકા ગાળા માટે રાહત આપતા MCLR દરોમાં કોઈ ફેરફાર કર્યો નથી. ઉદાહરણ તરીકે, રાતોરાત અથવા એક મહિનાની મુદતની લોન માટેનો વ્યાજ દર પહેલા જેવો જ રહેશે.

આ સરકારી બેંકે લોન માટે સીમાંત ખર્ચ આધારિત દર (MCLR)માં 0.15 ટકાનો વધારો કર્યો છે. અગાઉ તે 7.50 ટકા હતો. નવા અમલીકરણ પછી, MCLR વધીને 7.65 ટકા થઈ ગયો છે. બેંકના જણાવ્યા અનુસાર હોમ, ઓટો અને પર્સનલ લોન જેવી મોટાભાગની કન્ઝ્યુમર લોન મોંઘી થઈ ગઈ છે.

નવા વ્યાજ દરો જાણો

– બેંક ઓફ બરોડાનો બેઝ રેટ વાર્ષિક 8.15 ટકા છે. જયારે, BPLR (બેન્ચમાર્ક પ્રાઇમ લેન્ડિંગ રેટ) વાર્ષિક 12.45 ટકા છે.
– એક વર્ષની મુદતવાળી લોનનો વ્યાજ દર 7.50 ટકાથી વધારીને 7.65 ટકા કરવામાં આવ્યો છે.
– 3 મહિનાની લોન માટે MCLR 7.25 ટકાથી વધીને 7.35 ટકા થયો છે.
– 6 મહિનાની લોન માટે MCLR 7.35 થી વધીને 7.45 ટકા થયો છે.
– એક મહિનાની લોન પર 7.20 ટકા અને રાતોરાત લોન પર 6.80 ટકા.