ફિલ્મ અભિનેતા સલમાન ખાનને મળેલી ધમકીને લઈને મુંબઈ પોલીસની એક ટીમ પંજાબ પહોંચી ગઈ છે. મુંબઈ પોલીસ ક્રાઈમ બ્રાન્ચના એન્ટી એક્સટોર્શન સેલની 4 સભ્યોની ટીમ પંજાબ પહોંચી છે. પોલીસની આ ટીમ સલમાન ખાન કેસના આરોપીઓની પૂછપરછ કરશે. કહેવામાં આવી રહ્યું છે કે, સિદ્ધુ મુસેવાલા મર્ડર કેસ પહેલા લોરેન્સ બિશ્નોઈએ ફરી એકવાર સલમાન ખાનને મારવા માટે પ્લાન બી તૈયાર કર્યો હતો.

લોરેન્સ બિશ્નોઈ ગેંગે ફિલ્મ અભિનેતા સલમાન ખાનને તેના પનવેલ ફાર્મહાઉસ પાસે મારવાનું કાવતરું ઘડ્યું હતું, જેના માટે તે વિસ્તારની રેકી પણ કરવામાં આવી હતી.

દિલ્હી પોલીસ સ્પેશિયલ સેલના સીપી એચજીએસ ધાલીવાલે ખુલાસો કરતા જણાવ્યું કે, લોરેન્સ બિશ્નોઈ ગેંગે સલમાન ખાનને તેના પનવેલ ફાર્મહાઉસ પાસે મારવાનું કાવતરું ઘડ્યું હતું. આ ઘટનાને અંજામ આપવા માટે બિશ્નોઈ ગેંગ દ્વારા રેકી પણ કરવામાં આવી હતી. સલમાન ખાનના ફાર્મહાઉસની રેકી દરમિયાન ગેંગના સભ્યોએ કેટલાક સ્થાનિક લોકો સાથે પણ વાત કરી હતી. સ્પેશિયલ સીપી એચજીએસ ધાલીવાલે જણાવ્યું કે, બિશ્નોઈ ગેંગના સભ્યો નાના હથિયારથી આ ઘટનાને અંજામ આપવાનો પ્રયાસ કરી રહ્યા હતા. તેની પાસે પિસ્તોલ હતી.

આ મામલામાં પંજાબ પોલીસે કહ્યું હતું કે, આ સમગ્ર પ્લાનને આગળ વધારવાની જવાબદારી ગોલ્ડી બ્રાર અને શૂટર કપિલની હતી. લોરેન્સ બિશ્નોઈ ગેંગના શૂટર કપિલ પંડિતની તાજેતરમાં જ ભારત-નેપાળ સરહદેથી ધરપકડ કરવામાં આવી હતી. કપિલ પંડિત, સંતોષ જાધવ અને દીપક મુંડી કેટલાક અન્ય શૂટર્સ સાથે મુંબઈને અડીને આવેલા પનવેલમાં ભાડાના રૂમમાં લગભગ દોઢ મહિના રોકાયા હતા. શૂટર્સને એ પણ જાણવા મળ્યું હતું કે હિટ એન્ડ રન કેસ બાદ સલમાન ખાનની કાર ખૂબ જ ઓછી સ્પીડમાં છે.