બ્રહ્માસ્ત્ર : મેકર્સે ફિલ્મ પર પાણીની જેમ વહાવ્યા પૈસા, જાણો રણબીર આલિયાની ફિલ્મે કેટલા કરોડની કમાણી કરી

રણબીર કપૂર અને આલિયા ભટ્ટ સ્ટારર ફિલ્મ ‘બ્રહ્માસ્ત્ર’ વિશે ઘણા સમયથી ચર્ચા ચાલી રહી છે. ફિલ્મ હવે રિલીઝ થવામાં થોડા જ દિવસો બાકી છે. આ ફિલ્મ આ વર્ષની સૌથી મોટી રિલીઝ માનવામાં આવી રહી છે. આવી સ્થિતિમાં, દેખીતી રીતે જ ફિલ્મનું બજેટ પણ સાધારણ નહીં હોય. ફિલ્મના બજેટને લઈને એક મોટી માહિતી સામે આવી રહી છે.

9 સપ્ટેમ્બરે રિલીઝ થનારી ફિલ્મ ‘બ્રહ્માસ્ત્ર’ અત્યાર સુધીની સૌથી મોંઘી ફિલ્મ હોવાનું કહેવાય છે. કહેવામાં આવી રહ્યું છે કે, ફિલ્મની દરેક ફ્રેમ પર ખર્ચ જોવા મળશે. રિપોર્ટ્સ અનુસાર, મેકર્સે ફિલ્મના નિર્માણમાં 410 કરોડ રૂપિયાનો ખર્ચ કર્યો છે. સૌથી મોટી વાત એ છે કે, આ બજેટમાં ફિલ્મના પ્રમોશન અને સિનેમાઘરોમાં લાવવાનો ખર્ચ સામેલ નથી. ફિલ્મ પર આટલો ખર્ચ કરવા પાછળના નિર્માતાઓનું માનવું છે કે, દર્શકોને આ ફિલ્મથી પડદા પર એવો અનુભવ મળશે જે તેઓએ પહેલા ક્યારેય જોયો નથી.

રિપોર્ટ્સમાં કહેવામાં આવી રહ્યું છે કે, ડિઝની અને ધર્મા પ્રોડક્શનની આખી ટીમને વિશ્વાસ છે કે, બ્રહ્માસ્ત્રનો માત્ર લોકોના દિલમાં જ નહીં પરંતુ બોક્સ ઓફિસ પર પણ તેનો જાદુ જોવા મળશે. જાણકારી માટે તમને જણાવી દઈએ કે, આ ફિલ્મમાં રણબીર કપૂર જાદુઈ શક્તિઓ ધરાવનાર શિવ નામના યુવકની ભૂમિકામાં છે. ફિલ્મમાં આલિયા ભટ્ટ, અમિતાભ બચ્ચન, મૌની રોય અને નાગાર્જુન પણ મહત્વની ભૂમિકામાં જોવા મળશે.

ફિલ્મનું બજેટ કેવી રીતે વધ્યું?

તમને જણાવી દઈએ કે, આ ફિલ્મ 2020 માં રીલિઝ થવાની હતી પરંતુ કોરોના મહામારીને કારણે તેની રિલીઝ મોકૂફ રાખવામાં આવી હતી અને ફિલ્મનું બજેટ સતત વધતું ગયું હતું. આવી સ્થિતિમાં ફિલ્મની સ્ટારકાસ્ટની ફી પણ ઓછી નથી. રિપોર્ટ્સ અનુસાર, રણબીર કપૂરે લીડ રોલ માટે 25-30 કરોડ રૂપિયા ચાર્જ કર્યા છે. જ્યારે આલિયાએ 10-11 કરોડ રૂપિયા ચાર્જ કર્યા છે.