200 કરોડના મની લોન્ડરિંગ બાદ ચર્ચામાં આવેલા મહાઠગ સુકેશ ચંદ્રશેખર સામે તપાસ કરી રહેલી એન્ફોર્સમેન્ટ ડિરેક્ટોરેટની ટીમને મોટી સફળતા મળી છે. સુકેશ ચંદ્રશેખર સાથે જેકલીન ફર્નાન્ડીઝ અને નોરા ફતેહીના નામ પણ સામે આવ્યા હતા. બોલિવૂડ અભિનેત્રી અને સુકેશ ચંદ્રશેખરની જાળમાં ફસાઈ ગયેલી નોરા ફતેહી સરકારી સાક્ષી બનવા માટે તૈયાર થઈ ગઈ હોવાના સમાચાર સામે આવ્યા છે. નોરાએ તાજેતરમાં મની લોન્ડરિંગ એક્ટ 2002 ની કલમ 50 (2) અને 50 (3) હેઠળ આ કેસમાં પોતાનું નિવેદન આપ્યું હતું. એવામાં પણ સમાચાર સામે આવ્યા છે કે ED ખૂબ જ જલ્દી નોરા અને જેકલીન પાસેથી સુકેશને મળેલી મોંઘી ભેટ પણ જપ્ત કરી શકે છે.

એન્ફોર્સમેન્ટ ડિરેક્ટોરેટની ટીમ 200 કરોડની છેતરપિંડીના કેસમાં સુકેશ ચંદ્રશેખર વિરુદ્ધ તપાસ કરી રહી છે. સુકેશની સાથે બોલિવૂડ અભિનેત્રી નોરા ફતેહી અને જેકલીન ફર્નાન્ડીઝ ના નામ પણ સામે આવ્યા હતા. સુકેશે બંને અભિનેત્રીઓને કરોડોની ભેટ આપી હતી. જ્યારે ટીમ સાથે પૂછપરછ દરમિયાન, નોરા ફતેહીએ તેના પરના આરોપોને ખોટા ગણાવ્યા હતા. હવે આ કેસમાં વધુ એક માહિતી સામે આવી છે, જે મુજબ નોરા ફતેહી મની લોન્ડરિંગ કેસમાં સાક્ષી બનવા જઈ રહી છે.

અહેવાલો મુજબ, અભિનેત્રી નોરા ફતેહી હવે મની લોન્ડરિંગ કેસમાં ઠગ સુકેશ ચંદ્રશેખર વિરુદ્ધ સાક્ષી બનશે. તે સુકેશ ચંદ્રશેખર વિરુદ્ધ કાર્યવાહીમાં સાક્ષી તરીકે હાજર થશે. સુકેશે હાલમાં જ ચેન્નાઈમાં એક ઈવેન્ટમાં નોરા ફતેહીને કાર અને આઈફોન અને BMW ગિફ્ટ કર્યા હોવાનો આરોપ લગાવ્યો હતો. ત્યાર બાદ ED એ નોરાની પૂછપરછ કરી હતી પરંતુ નોરાએ તમામ આરોપોને ખોટા ગણાવ્યા હતા. હવે નોરાના કેસમાં સાક્ષી બન્યા બાદ ઘણા ખુલાસા થવાની આશા છે.