રાજ્યના ખેડૂતો માટે આવ્યા ચિંતાજનક સમાચાર, હવામાન વિભાગે કમોસમી વરસાદની કરી આગાહી

રાજ્યના ખેડૂતો માટે ફરીથી ચિંતાના સમાચાર આવ્યા છે. આ સમાચાર ખેડૂતોની ચિંતામાં વધારો કરી શકે છે. ભર શિયાળે ચોમાસાનો અનુભવ કરવાનો વારો આવ્યો છે. રાજ્યમાં ફરી એકવાર કમોસમી વરસાદની આગાહી હવામાન વિભાગ દ્વારા કરવામાં આવી છે.

ઉત્તર ગુજરાતમાં કમોસમી વરસાદની આગાહી કરવામાં આવી છે. વેસ્ટર્ન ડિસ્ટર્બન્સ સર્જાતા માવઠું પડી શકે છે. બનાસકાંઠા, પાલનપુર, ડીસા, થરામાં કમોસમી વરસાદની આગાહી કરવામાં આવી છે. 27 અને 28 ડીસેમ્બરના રાજ્યમાં વાદળછાયું વાતાવરણ બન્યું રહેશે.

તેની સાથે 28 ડિસેમ્બરે સામાન્ય વરસાદની આગાહી પણ કરવામાં આવી છે. વરસાદી સિસ્ટમ હટતા જ ઠંડીનો ચમકારો અનુભવાશે. નવા વર્ષની શરૂઆતમાં જ કાતિલ ઠંડીનો અનુભવ થશે.

બે દિવસ કડકળતી ઠંડીથી આંશિક રાહત મળશે. અમદાવાદ લઘુતમ તાપમાન 14.6 ડીગ્રી નોંધાયું છે. ગાંધીનગર 13.2 ડીગ્રી સાથે ઠંડુંગાર રહ્યું છે.

નોંધનીય છે કે, ચોમાસું પત્યા પછી ચાલુ વર્ષમાં ઓક્ટોબર મહિનામાં નવરાત્રી વખતે અને તે પછી નવેમ્બર મહિનામાં કમોસમી વરસાદ નોંધાયો હતો. આ વરસાદના લીધે ખેડૂતોને ઉભા પાકને તથા લણી લીધેલા પાકને નુકસાન થયાની ફરિયાદો સામે આવી હતી.