દિલ્હીમાં દિવાળીમાં આ વર્ષે પણ ફટાકડા પર રહેશે પ્રતિબંધ, પર્યાવરણ પ્રધાન ગોપાલ રાયે કરી જાહેરાત

રાષ્ટ્રીય રાજધાની દિલ્હીમાં આ વર્ષે પણ દિવાળીના અવસર પર ફટાકડા ફોડવા પર સંપૂર્ણ પ્રતિબંધ રહેશે. આમ આદમી પાર્ટીની સરકારમાં પર્યાવરણ મંત્રી ગોપાલ રાયે આજે સવારે આ અંગેની જાહેરાત કરી હતી. તેમણે ટ્વીટ કર્યું, ‘દિલ્હીના લોકોને પ્રદૂષણના ભયથી બચાવવા માટે, ગયા વર્ષની જેમ આ વખતે પણ તમામ પ્રકારના ફટાકડાના ઉત્પાદન, સંગ્રહ, વેચાણ અને ઉપયોગ પર સંપૂર્ણ પ્રતિબંધ છે, જેથી લોકોનો જીવ બચી શકે.

આ સાથે તેમણે લખ્યું કે, ‘આ વખતે દિલ્હીમાં ફટાકડાના ઓનલાઈન વેચાણ/ડિલિવરી પર પણ પ્રતિબંધ રહેશે. આ પ્રતિબંધ 1 જાન્યુઆરી, 2023 સુધી અમલમાં રહેશે. પ્રતિબંધનો કડક અમલ કરવા માટે દિલ્હી પોલીસ, DPCC અને મહેસૂલ વિભાગ સાથે મળીને એક એક્શન પ્લાન તૈયાર કરવામાં આવશે.

અગાઉ સોમવારે ગોપાલ રાયે કહ્યું હતું કે શિયાળામાં રાજધાનીમાં વાયુ પ્રદૂષણને નિયંત્રિત કરવા માટે કેન્દ્રીય આયોગે જે નિર્ધારિત કર્યું છે તેના કરતાં સરકાર વધુ કરશે. રાયે સંબંધિત 30 વિભાગોના અધિકારીઓ સાથેની બેઠક પછી જણાવ્યું હતું કે દરેક વિભાગને ચોક્કસ કાર્ય સોંપવામાં આવ્યું છે અને 15 સપ્ટેમ્બર સુધીમાં દિલ્હીમાં વાયુ પ્રદૂષણનો સામનો કરવા માટે અંતિમ યોજના સબમિટ કરવા માટે કહેવામાં આવ્યું છે.