આજે રિઝર્વ બેંક ઓફ ઈન્ડિયાની મોનેટરી પોલિસી કમિટીની મહત્વની બેઠક યોજાવાની છે. RBI આ બેઠકમાં ફુગાવા પર લગામ લગાવવા અને અમેરિકી ડોલર સામે રૂપિયાના ઘટતા મૂલ્યને રોકવા માટે કેટલાક મહત્વના નિર્ણયો લઈ શકે છે. એવી અપેક્ષા રાખવામાં આવે છે કે RBI ગવર્નર શક્તિકાંત દાસની આગેવાની હેઠળની છ સભ્યોની સમિતિ સતત ચોથી વખત વ્યાજદરમાં વધારો કરી શકે છે. આ સાથે રેપો રેટ 0.35 થી 0.50 ટકા થઈ શકે છે.

RBI એ માર્ચ 2020 માં કોરોના મહામારીને કારણે લોકડાઉનની અસરને ઘટાડવાના ઉદ્દેશ્યથી રેપો રેટમાં ઘટાડો કર્યો હતો. આ પછી, સ્થિતિ સામાન્ય થયા પછી, રેપો રેટને 4 મે, 2022 સુધી સ્થિર રાખવામાં આવ્યો. નાણાકીય નીતિ સમિતિની ત્રણ દિવસીય બેઠક બુધવારથી શરૂ થઈ હતી. સમિતિનો નિર્ણય આજે 30 સપ્ટેમ્બરે જાહેર કરવામાં આવશે.

સરકારે આરબીઆઈને ફુગાવાનો દર 2 ટકાના તફાવત સાથે 4 ટકા પર રાખવાનો લક્ષ્યાંક આપ્યો છે. જોકે, રિટેલ ફુગાવો જાન્યુઆરીથી આરબીઆઈના સંતોષકારક સ્તરથી ઉપર રહ્યો છે. ફુગાવાના ઊંચા સ્તર વચ્ચે સ્થાનિક ચલણમાં તીવ્ર ઘટાડો થઈ રહ્યો છે. યુએસ ચલણ સામે રૂપિયો હાલમાં 82 ની નજીક ટ્રેડ કરી રહ્યો છે. યુએસ સેન્ટ્રલ બેંક ફેડરલ રિઝર્વ દ્વારા વ્યાજદરમાં તીવ્ર વધારો કર્યા બાદ વિનિમય દરમાં ઘટાડો વધુ તીવ્ર બન્યો છે.

નિષ્ણાતોના મતે સેન્ટ્રલ બેંક ફરી એકવાર કી પોલિસી રેટ રેપોમાં 0.50 ટકાનો વધારો કરી શકે છે જેથી તે 5.9 ટકાની ત્રણ વર્ષની ટોચે લઈ જાય. હાલમાં તે 5.4 ટકા છે. આરબીઆઈએ મે મહિનાથી રેપો રેટમાં 1.40 ટકાનો વધારો કર્યો છે. ઇન્ડસ્ટ્રી બોડી એસોચેમે જણાવ્યું હતું કે યુએસ સહિત અન્ય ઘણી સેન્ટ્રલ બેન્કોના વ્યાજદરમાં ઝડપી વધારા વચ્ચે આરબીઆઈ નીતિગત વ્યાજ દરોમાં ઓછામાં ઓછો 0.35 થી 0.50 ટકાનો વધારો કરી શકે છે.