લાખોની કિંમતની કાર સાયરસ મિસ્ત્રીનો જીવ કેમ ન બચાવી શકી? હવે સત્ય બહાર આવશે, મર્સિડીઝે ભર્યું આ પગલું

Cyrus Mistry Accident: ટાટા સન્સના ભૂતપૂર્વ ચેરમેન સાયરસ મિસ્ત્રીના માર્ગ અકસ્માતમાં મૃત્યુની તપાસ કરવા હોંગકોંગથી મર્સિડીઝ બેન્ઝના અધિકારીઓની એક ટીમ મંગળવારે થાણે પહોંચી હતી. આ ટીમ મર્સિડીઝ કારની તપાસ કરશે, જે ગયા અઠવાડિયે માર્ગ અકસ્માતમાં સામેલ થઈ હતી. આ અકસ્માતમાં મિસ્ત્રી અને તેના મિત્રનું મોત થયું હતું.

પાલઘર એસપી બાલાસાહેબ પાટીલે કહ્યું, ત્રણ સભ્યોનું નિષ્ણાત જૂથ હોંગકોંગથી આવ્યું છે. આ જૂથ પોલીસ અધિકારીઓની હાજરીમાં તપાસ કરશે. તેમણે કહ્યું કે જે કાર ક્રેશ થઈ છે તેને થાણેમાં મર્સિડીઝ બેન્ઝના યુનિટમાં રાખવામાં આવી છે. અહીં પહોંચ્યા પછી, આ જૂથ તપાસ કરશે અને પછી તેનો રિપોર્ટ મર્સિડીઝ-બેન્ઝ કંપનીને સોંપશે.

4 સપ્ટેમ્બરના રોજ, સાયરસ મિસ્ત્રીની લક્ઝરી કાર મહારાષ્ટ્રના પાલઘર જિલ્લામાં રોડ ડિવાઈડર સાથે અથડાઈ હતી, જેમાં કારની પાછળની સીટ પર બેઠેલા મિસ્ત્રી (54) અને જહાંગીર પંડોલેનું મૃત્યુ થયું હતું. જાણીતા ગાયનેકોલોજિસ્ટ અનાહિતા પંડોલે (55) કાર ચલાવી રહ્યા હતા અને તેમના પતિ ડેરિયસ પંડોલે (60) તેમની સાથે આગળની સીટ પર બેઠા હતા. અકસ્માતમાં દંપતીને ઈજા થઈ હતી.

કંપનીએ પોલીસને વચગાળાનો રિપોર્ટ સોંપ્યો

ગયા અઠવાડિયે, મર્સિડીઝ-બેન્ઝે સાયરસ મિસ્ત્રીના અકસ્માત અંગેનો વચગાળાનો અહેવાલ પાલઘર પોલીસને સુપરત કર્યો હતો, જેમાં જણાવ્યું હતું કે રોડ ડિવાઈડર સાથે અથડાતા પાંચ સેકન્ડ પહેલાં બ્રેક લગાવવામાં આવી હતી. કંપનીએ કહ્યું કે તે કાર અકસ્માતની તપાસમાં અધિકારીઓને સહકાર આપી રહી છે અને માત્ર તેમની સાથે પરિણામો શેર કરશે. વચગાળાના અહેવાલમાં જણાવાયું હતું કે અકસ્માતની થોડીક સેકન્ડ પહેલા કારની ઝડપ 100 kmph હતી, જ્યારે કાર પુલ પરના ડિવાઈડર સાથે અથડાઈ ત્યારે તેની ઝડપ 89 kmph હતી. પાલઘર પોલીસે કાર ઉત્પાદકને ઘણા પ્રશ્નો પૂછ્યા છે, જેમ કે એરબેગ્સ કેમ ન ખુલી? શું વાહનમાં કોઈ ટેકનિકલ ખામી હતી? ટાયરનું દબાણ શું હતું? કારનું બ્રેક પ્રવાહી શું હતું?