કોંગ્રેસ અધ્યક્ષ પદની ચૂંટણીના ઉત્તેજના વચ્ચે રાજસ્થાનના સીએમ અશોક ગેહલોતે મોટી જાહેરાત કરી છે. પ્રમુખ પદ માટે ચૂંટણી લડવાની જાહેરાત કરતા તેમણે જણાવ્યું છે કે, હું આ ચૂંટણી માટે ઉમેદવારી નોંધાવીશ. આ દરમિયાન તેમણે એમ પણ જણાવ્યું કે, આ વખતે ગાંધી પરિવારમાંથી કોઈ વ્યક્તિ કોંગ્રેસ અધ્યક્ષ નહીં બને.

કેરળમાં મીડિયાના પ્રશ્નોના જવાબમાં ગેહલોતે જણાવ્યું કે, “મેં ઘણી વખત રાહુલ ગાંધી સાથે વાત કરવાનો પ્રયાસ કર્યો કે તેઓ અધ્યક્ષ બને. પ્રદેશ કોંગ્રેસ સમિતિએ પણ આ જ ઠરાવ પસાર કર્યો છે, પરંતુ તેઓએ તેનો ઇનકાર કર્યો છે અને જણાવ્યું છે કે, આ વખતે ગાંધી પરિવારમાંથી કોઈ વ્યક્તિ કોંગ્રેસ અધ્યક્ષ પદ માટે ચૂંટણી લડશે નહીં.

અશોક ગેહલોતે જણાવ્યું છે કે, હું કોંગ્રેસ અધ્યક્ષ પદ માટે ચૂંટણી લડીશ તે નિશ્ચિત છે. હું ટૂંક સમયમાં જ નામાંકન ભરવાની તારીખ નક્કી કરીશ. તેમણે જણાવ્યું કે, દેશની વર્તમાન પરિસ્થિતિને જોતા વિપક્ષને મજબૂત કરવાની જરૂર છે.