કોંગ્રેસના પૂર્વ અધ્યક્ષ રાહુલ ગાંધીએ ફરી એકવાર કેન્દ્રની મોદી સરકાર પર આકરા પ્રહારો કર્યા છે. રાહુલ ગાંધીએ જીએસટીના દરમાં વધારાને લઈને કેન્દ્ર સરકાર પર આકરા પ્રહાર કર્યા છે. તેમને ફરીથી એક વખત તેને ‘ગબ્બર સિંહ ટેક્સ’ કહીને સંબોધ્યો છે. આ સાથે કોંગ્રેસ સાંસદે દેશમાં બેરોજગારીના મુદ્દે પણ સરકારને આડે હાથ લીધી હતી.

કોંગ્રેસ સાંસદ રાહુલ ગાંધીએ જણાવ્યું છે કે, સરકાર માત્ર ટેક્સ વધારવામાં વ્યસ્ત છે. દેશમાં નોકરીઓ નથી. તેમણે આરોપ લગાવ્યો છે કે, કેન્દ્ર સરકાર વિશ્વની સૌથી ઝડપથી વિકસતી અર્થવ્યવસ્થાને નષ્ટ કરી રહી છે.

કોંગ્રેસના ભૂતપૂર્વ અધ્યક્ષ રાહુલ ગાંધીએ દેશમાં GST દરોમાં વધારાને કારણે મોંઘી થતી વસ્તુઓની યાદી શેર કરતી વખતે ટેક્સને “ગબ્બર સિંહ ટેક્સ” તરીકે ઓળખાવ્યો હતો. રાહુલ ગાંધીએ લખ્યું છે કે, “ટેક્સ વધારે, નોકરી નહીં. વિશ્વની સૌથી ઝડપથી વિકસતી અર્થવ્યવસ્થામાંની એકને કેવી રીતે નષ્ટ કરવી તે અંગે ભાજપનો માસ્ટરક્લાસ.”

નાણાપ્રધાન નિર્મલા સીતારમણની આગેવાની હેઠળની GST કાઉન્સિલે દૂધ, દહીં અને પનીર જેવી પેકજ ચીજો પર 5 ટકાના GST સ્લેબમાં લાવવાનો નિર્ણય કર્યો છે. આ સાથે ચોખા અને ઘઉં જેવી અનપેક્ડ વસ્તુઓને પણ 5 ટકા ટેક્સ હેઠળ લાવવામાં આવી છે. અત્યાર સુધી આ વસ્તુઓને GST માંથી મુક્તિ આપવામાં આવી હતી.

આ સિવાય 1000 રૂપિયા પ્રતિ દિવસથી ઓછી કિંમતની હોટેલ રૂમ પર 12 ટકા ટેક્સ લાગશે. અગાઉ તે મુક્તિની શ્રેણીમાં આવતું હતું. આ ઉપરાંત, હોસ્પિટલના રૂમના ભાડા પર 5 ટકાના દરે GST 5,000 રૂપિયા પ્રતિ દિવસ (ICU સિવાય) વસૂલવામાં આવશે. આ સાથે, સોલાર વોટર હીટર પર હવે પહેલા 5 ટકાની સરખામણીએ 12 ટકા જીએસટી લાગશે. એલઇડી લેમ્પ અને લાઇટ પર હવે 18 ટકા ટેક્સ લાગશે, જ્યારે પહેલા તેના પર 12 ટકા જીએસટી લાગતો હતો. કોંગ્રેસના વરિષ્ઠ નેતા શશિ થરૂરે પણ સરકારના આ પગલાની ટીકા કરી છે.