સાઉથ આફ્રિકાની હાર બાદ ભારતે પાસે પોઈન્ટ્સ ટેબલમાં પ્રથમ સ્થાન પ્રાપ્ત કરવાની તક, જાણો કેવી રીતે?

T20 વર્લ્ડ કપ 2022 માં ભારતીય ટીમ સુપર-12 માં અત્યાર સુધીમાં કુલ ચાર મેચ રમી છે. ટીમે ચારમાંથી ત્રણ મેચ જીતી છે. તે જ સમયે, ટીમ ઇન્ડિયા સુપર-12 ની તેની આગામી અને છેલ્લી મેચ 6 નવેમ્બર, રવિવારે મેલબોર્નમાં ઝિમ્બાબ્વે સામે રમશે. હાલમાં ટીમ ઈન્ડિયા પોતાના ગ્રુપમાં 6 પોઈન્ટ સાથે નંબર વન પર છે. પાકિસ્તાન અને સાઉથ આફ્રિકા વચ્ચે રમાયેલી મેચમાં પાકિસ્તાનનો 33 રને વિજય થયો હતો. પાકિસ્તાનની આ જીતથી ભારતીય ટીમને ટેબલમાં ટોચ પર રહેવામાં મદદ મળી હતી.

પાકિસ્તાન સામેની મેચ પહેલા સાઉથ આફ્રિકા 5 પોઈન્ટ સાથે પોઈન્ટ ટેબલમાં બીજા નંબર પર રહેલું હતું. આફ્રિકાએ તેની ચોથી મેચ પાકિસ્તાન સામે રમી હતી. જો આફ્રિકા આ મેચમાં જીતી ગયું હોત તો તે 7 પોઈન્ટ સાથે ટેબલમાં નંબર વન પર આવી ગયું હોત. પરંતુ આફ્રિકાને હરાવીને પાકિસ્તાને આવું ન થવા દીધું. હવે આફ્રિકા તેની સુપર-12ની આગામી અને છેલ્લી મેચ 6 નવેમ્બર, રવિવારે નેધરલેન્ડ સામે રમશે.

ઉલ્લેખનીય છે કે, ભારતીય ટીમ તેની આગામી મેચ ઝિમ્બાબ્વે સામે રમશે. જો ટીમ ઈન્ડિયા આ મેચ જીતે છે, તો તેના કુલ 8 પોઈન્ટ થશે, જે ગ્રુપની કોઈપણ ટીમમાંથી સૌથી વધુ હશે. ગ્રુપમાં હાજર તમામ ટીમોએ 4-4 મેચ રમી છે. તે જ સમયે, સાઉથ આફ્રિકાને 4 મેચમાં 5 પોઈન્ટ અને ભારતીય ટીમને 4 મેચમાં 6 પોઈન્ટ મળ્યા છે.

જો આફ્રિકા અને ભારત બંને પોતાની છેલ્લી મેચ જીતે તો ભારતીય ટીમના 8 પોઈન્ટ થઈ જશે જ્યારે આફ્રિકાના માત્ર 7 પોઈન્ટ હશે. આથી ટીમ ઈન્ડિયા ગ્રુપમાં ટોપ પર રહેશે અને સેમીફાઈનલમાં પ્રવેશ કરશે.