હર્ષા ભોગલે એશિયા કપની બેસ્ટ ઈલેવન પસંદ કરી, ભારતમાંથી માત્ર બે ખેલાડીઓને સ્થાન આપ્યું

એશિયા કપ 2022 સમાપ્ત થવાના આરે છે. તેની અંતિમ મેચ 11 સપ્ટેમ્બરે પાકિસ્તાન અને શ્રીલંકા વચ્ચે રમાશે. ભારતીય ટીમ આ ટૂર્નામેન્ટમાંથી બહાર થઈ ગઈ છે. સુપર ફોરની મેચમાં ભારતને પાકિસ્તાન અને શ્રીલંકા સામે હાર મળી હતી. જ્યારે તેણે તેમાં અફઘાનિસ્તાનને હરાવ્યું હતું. કોમેન્ટેટર અને પત્રકાર હર્ષા ભોગલેએ એશિયા કપ 2022ની સર્વશ્રેષ્ઠ ઈલેવન પસંદ કરી છે. તેણે તેમાં માત્ર બે ભારતીય ખેલાડીઓને સ્થાન આપ્યું છે.

હર્ષા ભોગલેએ પોતાની સર્વશ્રેષ્ઠ ઈલેવનમાં માત્ર બે ભારતીય ખેલાડીઓને સ્થાન આપ્યું છે. જેમાં વિરાટ કોહલી અને ભુવનેશ્વર કુમારની પસંદગી કરવામાં આવી છે. કોહલી એશિયા કપ 2022 માં અત્યાર સુધી સૌથી વધુ રન બનાવનાર બેટ્સમેન છે. તેણે 5 મેચમાં 276 રન બનાવ્યા છે. આ દરમિયાન કોહલીએ એક સદી અને બે અડધી સદી ફટકારી છે. જ્યારે ભુવનેશ્વર અત્યાર સુધી સૌથી વધુ વિકેટ લેવાના મામલે ટોપ પર છે. તેણે 5 મેચમાં 11 વિકેટ લીધી છે. ભુવીએ એક ઇનિંગમાં 5 વિકેટ પણ લીધી છે.

ઉલ્લેખનીય છે કે, હર્ષા ભોગલેએ ઓપનિંગ માટે પાકિસ્તાનના બેટ્સમેન મોહમ્મદ રિઝવાન અને અફઘાનિસ્તાનના રહેમાનુલ્લા ગુરબાઝને પસંદ કર્યા છે. જ્યારે કોહલી ત્રીજા નંબર પર છે. નજીબુલ્લાહ ઝદરાના, ભાવુકા રાજપક્ષે અને દાસુન શનાકાને પણ બેસ્ટ ઈલેવનમાં સ્થાન મળ્યું છે. પાકિસ્તાનના બોલર શાદાબ ખાન અને મોહમ્મદ નવાઝ પણ તેમાં સામેલ છે. નસીમ શાહ અને દિલશાન મદુશંકાને પણ સ્થાન મળ્યું છે.

હર્ષા ભોગલેની એશિયા કપ 2022 ની બેસ્ટ ઈલેવન –

1. મોહમ્મદ રિઝવાન, 2. રહેમાનુલ્લાહ ગુરબાઝ, 3. વિરાટ કોહલી, 4. નજીબુલ્લાહ જાદરાન, 5. ભાનુકા રાજપક્ષે, 6. દાસુન શનાકા, 7. શાદાબ ખાન, 8. મોહમ્મદ નવાઝ, 9. ભુવનેશ્વર કુમાર, 10. નસીમ શાહ, 11. દિલશાન મદુશંકા.