ઈંગ્લેન્ડ સામેની પાંચમી ટેસ્ટ પહેલા ટીમ ઈન્ડિયાને મોટો ઝટકો લાગ્યો છે. સૂત્રોના જણાવ્યા અનુસાર, કોરોનામાંથી સ્વસ્થ થઈ રહેલા રોહિત શર્મા પાંચમી ટેસ્ટમાં રમશે નહીં. તેના સ્થાને ઝડપી બોલર જસપ્રીત બુમરાહને સુકાનીપદ સોંપવામાં આવ્યું છે.

તમને જણાવી દઈએ કે, રોહિત શર્મા કોવિડ-19 પોઝિટિવ છે અને હાલમાં આઈસોલેશનમાં છે. ટીમ ઈન્ડિયાએ આજે એજબેસ્ટન ખાતે પ્રેક્ટિસ શરૂ કરી હતી, પરંતુ કેપ્ટન રોહિતે તેમાં ભાગ લીધો ન હતો. આ ટેસ્ટ વર્ષ 2021 માં કોરોના વાયરસને કારણે રદ કરવામાં આવી હતી. હાલમાં ટીમ ઈન્ડિયા શ્રેણીમાં 2-1થી આગળ છે. પરંતુ તાજેતરમાં ન્યુઝીલેન્ડ સામેની ક્લીન સ્વીપ બાદ ઈંગ્લેન્ડનો ઉત્સાહ ઉંચો છે.

ભારતીય ટીમ કોઈપણ ભોગે સીરીઝની છેલ્લી ટેસ્ટ જીતવા માંગે છે. આવી સ્થિતિમાં ટીમના તમામ ખેલાડીઓ ખૂબ મહેનત કરી રહ્યા છે. ભારતીય ટીમના વિકેટ કીપર બેટ્સમેન ઋષભ પંતે પણ તેની ઈન્સ્ટાગ્રામ સ્ટોરી પર એક ફોટો શેર કર્યો છે. આ ફોટોમાં જોઈ શકાય છે કે, ભારતીય ખેલાડીઓ મેદાનમાં છે. તે જ સમયે, ભારતીય ટીમની પ્રેક્ટિસના કેટલાક વીડિયો પણ સોશિયલ મીડિયા પર વાયરલ થઈ રહ્યો છે. આ વીડિયોમાં રોહિત શર્મા દેખાતો નથી. ખરેખર રોહિત શર્માનો રિપોર્ટ કોરોના પોઝિટિવ આવ્યો હતો, ત્યારથી તે આઈસોલેશનમાં છે.

બંને ટીમોની સંભવિત ઈલેવન

ભારતીય ટીમ : શુભમન ગિલ, મયંક અગ્રવાલ, ચેતેશ્વર પૂજારા, વિરાટ કોહલી, હનુમા વિહારી, ઋષભ પંત, રવિન્દ્ર જાડેજા, શાર્દુલ ઠાકુર, મોહમ્મદ શમી, જસપ્રિત બુમરાહ (કેપ્ટન) અને મોહમ્મદ સિરાજ.

ઈંગ્લેન્ડ ટીમ : એલેક્સ લી, જેક ક્રોલી, ઓલી પોપ, જો રૂટ, જોની બેયરસ્ટો, બેન સ્ટોક્સ (કેપ્ટન), બેન ફોક્સ/સેમ બિલિંગ્સ (વિકેટકીપર), મેટી પોટ્સ/જેમી ઓવરટોન, સ્ટુઅર્ટ બ્રોડ, જેક લીચ, જેમ્સ એન્ડરસન.