દુનિયાના સૌથી મોટા સર્ચ એન્જિન ગૂગલે ચીનમાં ગૂગલ ટ્રાન્સલેશન સર્વિસ બંધ કરી દીધી છે. ગૂગલ ટ્રાન્સલેટ સેવા બંધ કરવામાં આવી છે. તમને જણાવી દઈએ કે, ચીને મોટાભાગના દેશોની સોશિયલ મીડિયા કંપનીઓ દ્વારા આપવામાં આવતી મોટાભાગની સેવાઓ પર પ્રતિબંધ મૂક્યો છે. ગૂગલ ટ્રાન્સલેટ એ ચીનમાં ગૂગલ દ્વારા પૂરી પાડવામાં આવતી કેટલીક સેવાઓમાંની એક હતી, જે હવે બંધ કરવામાં આવી છે.

રીલિઝ થયેલા અહેવાલો અનુસાર, ચીનમાં અમેરિકન ટેક કંપનીએ ઓછા ઉપયોગને કારણે ટ્રાન્સલેશન સેવા બંધ કરી દીધી છે. ચીનમાં ટ્રાન્સલેશન વેબસાઇટ ખોલવાથી હવે એક સરળ ‘સર્ચ બાર’ અને ‘લિંક’ પ્રદર્શિત થાય છે, જે ક્લિક કરવાથી હોંગકોંગમાં ઉપલબ્ધ કંપનીના વેબપેજ પર લઈ જાય છે. આ વેબપેજ ચીનમાં પ્રતિબંધિત છે.

ચીનમાં ઘણા વપરાશકર્તાઓએ તેમની સોશિયલ મીડિયા પોસ્ટમાં શનિવારથી ‘ગુગલ ટ્રાન્સલેટ’ સેવાનો ઉપયોગ કરવામાં સક્ષમ ન હોવાની જાણ કરી છે. તેમણે કહ્યું કે ગૂગલના ક્રોમ બ્રાઉઝરમાં ઉપલબ્ધ ટ્રાન્સલેશન ફીચર પણ હવે ચીનમાં કામ કરતું નથી.

ગૂગલે એક નિવેદન જારી કરીને કહ્યું છે કે, ચીનમાં ‘ઓછા વપરાશ’ને કારણે ‘ગુગલ ટ્રાન્સલેટ’ સેવા બંધ કરી દેવામાં આવી છે. જોકે, એ સ્પષ્ટ કરવામાં આવ્યું નથી કે, ચીનમાં કેટલા યુઝર્સે ‘Google Translate’ સર્વિસનો ઉપયોગ કર્યો છે. ગૂગલે 2017 માં ચીનમાં ટ્રાન્સલેશન એપ લોન્ચ કરી હતી. ચાઇનીઝ વપરાશકર્તાઓને આકર્ષવા માટે, કંપનીને પ્રખ્યાત ચાઇનીઝ-અમેરિકન રેપર એમસી જિનની જાહેરાત પણ કરાવી હતી.